Uncategorized

بطل تقول لا علي حاجه مجربتهاش

( الجمله دي كانت في الحمله الإعلانيه لشاي بارد الي عملها احمد حلمي, و فعلا الشاي دة ناس كتير بقول عليه لا او يع من غير ما تجربه حتي لمجرد انه شاي ساقع مش سخن).

انا بصراحه كنت من ثلاث ابطال العالم في الرجيم لا ده انا ممكن اكون بطل العالم فعلا في الرجيم ,, انا جربت كل انواع الرجيم الي قال عليها مصطفي حلمي في البوست الاول بتاعه زي الكيميائي و رجيم السعرات الحراريه و رجيم اللقيمات و رجيم التفاح ورجيم خل التفاح والمايه و رجيم التشيز كيك وتشوكليت كيك,J ازيد عليه رجيم التنويم بالايحاء(التنويم المغنطيسي) و رجيم الابر الصينيه و رجيم الحجامه و جربت كل انواع الحبوب الي قالو انها بتخسسو كمان اشتريت جهاز جري في البيت الي هو دلوقتي بيتحط علي سجاده الصلاه.

غير كدة انا من سنه تقريبا رحت دفعت فلوس كتي قوي في جيم (تقريبا نفس سعر بالون المعدة و نص ثمن عمليه قص المعده ومش هقول علي المبلغ علشان‫#‏اهل_الشر‬) علشان يدربني مدرب خصوصي (personal trainer) و كانت المده اربع شهور علشان المدرب يمرني تمارين تخسيس و ينظملي اكلي بجدول هو عامله, وفعلا نزلت شويه صغيرين لانه كان بيكتر البروتين لكن بعد الاربع شهور وزني زاد اكتر من الاول.

وبعدها رحت لدكتور تخسيس في مركز كبير ومشهور في البلد الي عايش فيها و لما شافني وبصلي قالي انت قادر تمشي علي الارض كدة ازاي و قالي هعملك نظام غذائي هينزلك في الاول 4 كيلو علي الاقل و ان الفطار زبادي والغداء تفاعي و العشاء اربع قطع خص وحاجات من هذا القبيل (طبعا انا ساعتها افتكرت تحاليل الدهون الثلاثيه بتاعتي وإني بدأت اخد دواء ضغط وانا لِسَّه صغير، مفكنش قدامي حل تاني).

و كالعاده برضه دفعت المبلغ المحترم بس هم ادوني شكولاتات دايت وشبسي دايت كتيير و قالولي ده للثلاث شهور قدام وبصراحه اكلتها كلها تاني يوم وانا رايح الشغل.

المهم يوم الموعد الاسبوعي رحت للدكتور طبعا وكانت المفاجئة وزني زايد تلاته كيلو في اول اسبوع رجيم.

الدكتور: اييييييييييييييييييه يا ابني لا لا لا انت جاي تهزر ,, مينفعش كدة (قلت ده هيندهلي حسين من جوه).

انا: (منكسر كدة وباصص في الارض وفي ذله شديده ) انا اسف يا دكتور اصل امبارح كان مزاكي وحش قوي قوي فرحت اكلت 2 ايس كريم.

الدكتور: وايه يعني 2 ايس كريم ميعملوش كل ده.

انا: لا يا دكتور اصل الاتنين ايس كريم من عن باسكن روبنز (وقعت اشرحله ان كل واحدة كان فيها بولتين كبار وان الهوت شوكلت كتير واللوز المحمص كتير وبلاش نوع ايه وبحب نوع ايه(.

لقيت الدكتور عينه برقت وقعد يسمع وكله اذان صاغيه.

المهم اتفقنا علي نظام غذائي تاني وان انا خلاص مش هعمل كدة تاني وهبقي مؤدب واسمع الكلام و همشي علي النظام.

عدي الاسبوع التاني ورحت للدكتور يوم السبت في المعاد ولقيت الدكتور بيستقبلني بحفاوه شديده فأفتكرت اني خسيت وبان عليا فلقيته بيقولي اسكت مش انا بعد ما خلصت العيادة المره الي فاتت قفلت وجريت علي باسكن روبنز طلبت نفس الي انت قلت عليه بالظبت بنفس الشكولاتة السخنة واللوز المحمص الكتير وقالي أصل بصراحه البرزنتشن بتاعتك وانت قاعد تشرحلي شكل وطعم الآيسكريم والشكلاته السخنه كان لا يقاوم ..

وطلعت من عند الدكتور وانا سعيد جدا جدا ان قدرت أثر عليه والحمد لله جبت نتيجه معاه وربنا يوفقني دايما لفعل الخير

طبعا من يوم ما سجلت عند الدكتور لحد قبل ما أبدأ النظام و و وزني و لله الحمد زايد 8 كيلو ونص.

أنا بحكي الحكايه دي علشان ابين قد ايه احنا كان تأثيرنا سلبي علي الكوكب والله ومكناش بنفكر في صحتنا لا كنا بنأثر علي الأخرين بالسلب و كنت خلاص بقه كنت يأست وقلت خلاص مفيش قدامي غير العمليات ورحت لدكتور فعلا و بدأت في الاجراءات و التحاليل وسألت ناس اعرفها عملت العمليه قالو علي المعاناه الي عانوها وعن عدم الاكل والشرب وكنت محتار.

لكن في يناير إلي فات مصطفي حلمي كتب بوست عن Plant based diet , ودي كانت اول مره اسمع عنه و الي بتلخص بأن الواحد بينقطع انقطاع تام عن المنتجات الحيوانيه كلها و الزيوت والسمن و البيبسي والسكر و الملح والمعلبات والقهوة الخ……..وانه ازاي نزل 28 كيلو في فتره صغيره ومن تعب او جوع.

لكن زيي زي اي مواطن مصري صالح قلت الموضوع ده مينفعنيش, ازاي هبطل احط 6 معالق سكر علي الشاي والقهوه ,او ابطل ايس كريم وتشيز كيك!!! , وازاي هبطلح احط ملح زياده علي الاكل و الان الاكل من غير ملح اكل عيانين خالص (يعي) واني هبطل لحمه ،، انا ابطل لحمه طب ازاي، وقلت خلاص هعمل العمليه وبدأت في الإجراءات فعلا

لحد مسمعت جمله احمد حلمي

(بطل تقول لا علي حاجه مجربتهاش).

قلت خلاص هجرب طريقه مصطفي حلمي خصوصا لما شفت حلقه بتتكلم علي نفس الموضوع في مقابله مني الشاذلي مع فيروز ناصر و هجرب لمن بطريقتي (هحط التاتش بتاعي يعني) و انضم لنقابه الفيجيترين لاني اساسا مش باكل فراخ ولا اي نوع من الطيور وقلت ممكن اكل يوم الجمعه سالمون ستيك(عشقي) يعني هدخل بعض الاسماك في الموضوع,, وفعلا بدأت والتزمت بنسبه 100% بالنظام (ومن غير التاتش بتاعي) Lوالنتيجه اني نزلت في اول 15 يوم حوالي 7 كيلو الي مكنتش احلم بيهم نهائي و حياتي فعلا اتغيرت للأحسن وبقيت صحيه اكتر وبقيت بستخدم السلم في الطلوع والنزول بدون اي تعب ,والحمد لله بقيت بشرب الشاي الاخضر من غير سكر و معتش ليا نفس خالص للملح ولا اللحوم ولا حتي السالمون, وبقيت بحب الاكل بطريقه PBD وبتفنن فيه ،يعني بعمل مثلا الفاصوليا والخضار في الطاجن وبيطلع طعمها تحفه جدأ, لدرجه اني كرهت الاكل العادي.

ومره باسم يوسف حكي مره انه اكل بيتزا وتعب جدا بعدها فأنا حلمت ان احنا في البيت طالبين بيتزا و انا استخبيت منهم وانهم جروا ورايا علشان اكل منها وانا رفضت رفض قاطع, (سبحان مغير الاحوال والله).

طبعا في ناس كتير في الاول اعترضت علي الموضوع لكن انا كنت بتغلب علي الموضوغ ده اني اقول ان الدكتور في مانعني عن الحاجات دي (ماهو باسم يوسف دكتور برضه) علشان مدخلش في ازاي نحرم ما أحله الله وندخل في جدال و وجع قلب.

و في ناس تانيه بدأت تبعتلي أو بتحط علي الجروب ان النباتيين اكتر عرضه للسرطان من الناس الي بتاكل اللحوم وكنت برد عليهم برضه ان بابا الله يرحمه مات بمرض السرطان و كان بياكل لحوم عادي جدا و تقريبا كل الي جالهم سرطان اعرفهم كانو بياكلو لحوم و عسل وملح عادي برضه ويعني متصورش الموضوع ليه علاقه وكله بأمر الله.

بس في النهايه علشان انا طولت كتير بس احب اشكر مصطفي حلمي كتير جدا جدا جدا انه بجد غير حياتي وغير حياه ناس كتير هو ممكن يكون ميعرفهمش للافضل و من غير جوع ولا تعب, وبشكر كل الي علي الجروب علي الوصفات الجميلة و علي التشجيع, و بدعي ربنا يثبتي علي النظام ده طول العمر ان شاء الله وأوصل للوزن المثالي واعيش حياه صحيه.

و بعد التحاليل الجديده هقول علي النتيجه ان شاء الله وهقول انا خسيت قد ايه وكله هيكون موثق بالصور والله الموفق
والمستعان.

———————————————
انا واحد من الناس كنت بقول لا علي نظام PBD لكن لما جربته حبيته جدا.

انضم معنا

facebook group

بحث

الأساسيات (مهم جدا)

اعراض الانسحاب

معرض الصور