قصص نجاح

عدى تقريبا شهر…ورغم انى تجربتى ما اكتملتش لسه..لكنى لقيتنى واجب عليا أشاركها معاكم ..علشان بالذات الجداد والمترددين…

زى ناس كتير قرأت بوست مصطفى حلمى وانبهرت وقبلها كنت قرات موضوع عن ان باسم يوسف نباتى وكنت منبهرة…واااو حاجات كتير بيبطلوها علشان يخسوا وعلشان الصحة وكان حساسي ان ده صعب أوى وبياكلوا ايه بأه….شئ مثير للاعجاب فعلا…ولما شوفت الجروب بصراحة بدأت الفكرة تتسلل جوايا…لحد ما قرأت بوست السيدة هدى رشاد ” قصتى مع أسرة باسم يوسف ” وازاى اتغلبت على آلامها الشديدة وده كان العامل الحاسم
كنت تقريبا عندى آلام فى معظم مفاصلى بداية من مفصل القدمين الكتف الرقبة..ارتشاح فى الكوع بيسبب آلام من حوالى سنتين ومفيش مسكنات محوقة وده لارتفاع نسبة اليوريك أسيد والاملاح عندى…وآخر حاجة صابعى كان بدأ يوجعنى بشدة طول الليل طول النهار ولا بيتفرد ولا بيتنى..وهو الموضوع اللى آخرته بتكون عملية تسليك أوتار..وده الشئ اللى أصابنى بفزع شديد…كنت باخد يوميا من اتنين لتلاتة مسكنات بنادول على باسط عضلات على مضاد للالتهابات ..ليريكا..فلوتاك..أمبيزيم…مجموعة من المسكنات اللى فى الغالب كنت بخودهم تأدية واجب وحفضل متألمة عادى جدا….
كان المفتاح انى ابطل أساسى اللحوم الحمرا والفراخ..الملح..السكر..الزيوت والأجبان
قررت انى أبدأ وأجرب..فى اكلات كتير شكلها اطيف وانا أساسا بحب الخضار والفاكهة أوى…والتحدى الحقيقي كان فى تقليل الملح اللى انا بدون مبالغة كنت بغرف منه غرف بالكبشة ملو ايدى كدا 😳..ووصلته الى بالكتير نص معلقة صغيرة ملح البحر..اساس الادمان عندى..وقمة الصعوبة كانت فعلا فى الجبنة وصدق د.باسم يوسف اما قال عليها شريرة 😑 كنت ممكن أخلص جبنة بريزيدون كوباية بالعيش السن قدام مسلسل..وقال ايه دايت ..وهى أصلا طعمها كله قشطة ودهون ويموت من الحلاوة 😭 بس كنت خلاص قررت قرار قاطع انى حبطلها..فكنت بتحاشى انى أشوفها وأتواجد معاها فى مكان واحد من الأساس ..النسكافيه كنت حولته قبل التزامى بالنظام لقهوة باللبن ثم قللتها ثم وصلت لآخر الشهر انى بطلتها تماما
النتيجة … الحمدلله الحمد لله..وفى أقل من اسبوع كل الآلام اتبخرت…اختفت…تلاشت بفضل الله أولا ..ثم نظام ال pbd …صابعى وكوعى والقدمين مفيش آلام…بطلت آخد مسكنات نهائى…بالنسبة لرقبتى وكتفى اللى كان بيجيلى فيهم ألم رهيب مايتوصفش..و أبقى مش قادرة أتكلم مع بناتى ولا أرد عليهم من كتر الألم وانا كل أعصاب الرقبة مضغوطة ومتألمة ومغمضة عينى من كتر الصداع والألم مهما حصل فى البيت مش قادرة أتفاعل معاهم من كتر الم الرقبة عافاكم الله منه ..الحمد لله عدى الشهر وماجاليش ولا كريزة الم من دول بفضل الله …لكن أنا لسه حطاهم تحت المراقبة.. ادعولى يتم شفايا و مااتعبش كدا تانى
بالنسبة للوزن أنا عندى حولى 18او 20 كيلو زيادة…اول 10 ايام نزلت 4كيلو بنجاح الحمد لله…احتفلت بغباء شوية ..لأنى بصراحة مش ملتزمة بنسبة 100% وكنت باكل سمك كل جمعة ..المهم طلعت اتنين كيلو 😣😣 انا طبعا بلخبطتى السبب وبعدهم قعدت حوالى عشر أيام تانيين علبال مانزلت الاتنين كيلو دول ..وآخر 10ايام نزلت كيلو كمان يعنى اجمالى نزلت 5كيلو ولو ماكنتش لخبطت يمكن كانوا 7او أكتر..لازم أعترف انى كنت بلخبط فى الكميات …كنت باكل مكسرات وسودانى وتمر وزبدة فول سودانى بهبل شوية 😤😕😕
وكمان كان عندى زى رغبة انى اتطمن ان فى اكلتت حلوة وانى حقدر ابقى مبسوطة..فكنت بجرب معظم الوصفات ..وباكل نشويات..فلازم أعترف ان نزول الوزن مرضى جدا وخاصة انه..فى منطقة البطن وانى نزلت جبت بنطلون مقاس 38 بعد ماكنت 42 😃✌✌
على مستوى الرياضة فبعد ماكنت بمشى على المشاية بمنتهى الملل على سرعة 4 وبالعافية أكمل نص ساعة وساعات لأ فأنا بقيت ممكن أعمل بالتبادل جرى على 8مع المشى على 4 أو 6 وده لمدة ساعة
قولوا ماشاء الله واوعوا تقروا عليا… 😃😃✋✋
النفس أحسن ومنتظم …البشرة أفضل وماعدتش دهنية ..زى الأول من منطقة الأنف والذقن
الحمد لله رب العالمين ..أنا فى قمة السعادة والرضا عن نظام ال pbd اللى بعتبره فتح من ربنا ليا انه يعفو عنى ..ومستحيل انى أختار انى أرجع للآلام دى تانى…وحتى لو مانزلتش فى الوزن ..او كان النزول بعد كدا بطئ..فأنا مستمرة للأسباب الصحية..اللى هى حقيقي لا تعوض..واتمنى كل واحد منكم يحظى بها
أعتقد ان أكتر الناس احتياجا للنظام أصحاب أمراض المفاصل وارتفاع نسبة اليوريك أسيد والأملاح والكوليسترول
الف ألف شكر ..ل د.باسم يوسف …مصطفى حلمى..أخوياHisham El KanayatiEl Kanayati اللى بدأ قبلى من حوالى سنة ..وعمل شير لبوست مصطفى حلمى..وكل الجروب اللى حقيقي عامل زى المصحة اللى بنجتمع فيها لمؤازرة بعض وتشجيع بعض ..واعطاء دفعة ايجابية للناس علشان نواصل ونعرف انها مش صعبة وانها مستهلة اوى اوى ..
وأرجوكم ادعولى بس ربنا يتم شفايا ويعافينى من تلك الآلام ماترجعش تانى.
أخيرا لازم اعترف ان الخضار والفاكهة اكلهم والوقفة أمامهم فى اى مكان مبهجة وتبعث على السعادة بالوانهم وأشكالهم..اوقات بحس انى مش قادرة أقاوم أنى أشترى قرنبيطة أمورة ..بتنده عليا وبتغمزلى والله
وكأنى عايزة أقول قرنبيط فلفل الوان بتنجان موز بطيخ …..أحمدك يااااااارب 😃😃

انضم معنا

facebook group

بحث

الأساسيات (مهم جدا)

اعراض الانسحاب
plant based diet
plant based diet
The Protein Myth

معرض الصور