فقدان الوزن, قصص نجاح

إنهرده 22 إبريل….كملت شهرين بالظبط pbd و كنت وعدتكوا إني في اليوم ال60 أقولكوا النتايج و خلاصه التجربه حتي الأن يمكن تفيد ناس لسه متردده او بتبتدي او ملقلقه و مش عايزه تكمل
أولآ أنا من الناس الي مشيوا علي النظام لأسباب صحيه بحته مش أخلاقيه بالمره عشان نبقي واضحين
وزني كان ذاد جدآ بشكل غير مسبوق في أخر سنه و بالتالي الكولسترول عندي إرتفع لما فوق الhigh risk و ضغطي كان بيوصل لأرقام مخيفه
القولون كان مدمر بمعني الكلمه ألام رهيبه بتسمع في الرجلين و الصدر و الضهر كانت بتوصل لاشتباه في ذايده أكتر من مره
طبعآ نهجان رهيب مع أقل مجهود،اللبس كله ضاق ،شكلي في المرايه يقرف ،مجروئش أخرج من غير ميك أب ، بهرب من مقابله الناس الي بقالهم كتير مشافونيش ،مبقتش بعرف في الفتره الأخيره أحط رجل علي رجل و ده كان مأثر فيا اوي

في وسط كل ده حبيبتي

Inas Salama Elshawaf
ضافتني علي الجروب …فضلت شهر تقريبآ أدخل أقرا و أبص و أسأل و أفهم و بعدين قررت إني أجرب أكيد مش هخسر حاجه …
كنت خايفه طبعآ م الفشل أو إن النشويات تخليني أتخن أكتر أو أتعب و مقدرش أكمل و كان عندي كل المخاوف الطبيعيه ،طب هفطر ايه طب هعيش من غير لحوم خالص؟! طب السمك؟ طب الملح ؟ طب يا تري هخس؟ أنا أصلآ الحرق عندي سئ جدآ طول عمري و بخس بصعوبه شديده ،بموت في الجبن و الذبادي و الفراخ و القهوه و الحلويات فالقرار مكنش سهل …
المهم يوم 21 فبراير نزلت السوبر ماركت جبت كل الخضار ر الفاكهه و الحبوب و البقول و التوابل و المكسرات الممكنه و رحت الجيم جددت اشتراكي و اتفقت مع personal trainer و بدأت
طبعآ مش هنكر ..أول 3 أيام كانوا قطعه م الجحيم صداع رهيب و فرهده و همدان و مفيش تركيز و قريفه فظيعه
بعد كده خلاص كل ده اختفي و فضلت مشكله ظبط طعم الأكل و إيجاد البدائل …مره ف مره اتعلمت ايه الي طعمه بيزبط بالليمون و ايه بالسماق و ايه بالكاري …و ايه الي احطله شعره ملح بحر تظبطه …اتعلمت كمان أهميه ان الأكل يكون متاح و جاهز علي طول لوأد الفتن في مهدها …مره في الأسبوع أدخل المطبخ اعمل أكلتين بسله مثلا و اتنين فاصوليا و اتنين كوسه او باميه او مسقعه او محشي او لوبيا او فاصوليا بيضا
و اسلق بليله و اعمل عجينه طعميه و اسلق شويه عدس او حمص او كينوا و اغسل كميه خضار سلاطه كبيره و علب بقي و ف التلاجه …
أي يوم خارجه و عارفه اني هقضي وقت طويل بره اكلي معايا ف ال lunch box
ميتي مبسيبهاش من إيدي و خياري و خسي ف ايدي سلاح
مريت بأكتر من إختبار صعب …ديش بارتي ،باربيكيو بارتي،عيد ميلاد ،فرح،أوبن بوفيه ف اوتيل و الجمل المصريه الشهيره بتاعت معلش انهرده فري و مجتش من دي أكيد كنت بتدايق بس وجود اكلي معايا كان بيسهل الموضوع كتير

أقدر أقول اني ملتزمه بنسبه تتجاوز 90% …العك عباره عن نص مج نسكافيه بلاك كل كام يوم ،نص معلقه مربي فراوله بدون سكر محلاه بعصير عنب احيانآ ،نشويات ذياده شويه في بعض الأحيان ،نوبات جوع ليلي تضطرني أكل متأخر بس في حدود الpbd برضو رشه ملح بحر خفيييفه مع بعض الاصناف عشان تتبلع

النتائج بقي عشان أكيد لو حد صبر يقرا كل ده مستني الحته دي
الحمد لله خلال شهرين وزني نزل 11 كيلو …انا عارفه انه مش كتير بس بالنسبه لي ده إنجاز لان سني مش صغير و الحرق عندي ضعيف و جسمي زهق ريجيمات فبقي عنيد جدآ في النزول
طبعآ مع الرياضه كمان شكل جسمي و مقاساته اتغيروا بشكل لافت جدآ و بدأت أضيق الهدوم و البس الحاجات الي كانت ضاقت
التنفيخ الي كان ف وشي و تحت عنيا اختفي تمامآ و في طريقي إني أرجع كيوت زي ما كنت

ضغطي بعد ماكان بيوصل 170 /110
و بالدوا 130/95
دلوقتي بقي 110/75 و قللت الدوا لنص الجرعه
الكولسترول الحمد لله نزل من 260 ل198

قولوني إرتاح كتيييير …طبعآ لما بكتر بقول شويه بيتعب بس مش زي الأول نهائي
مشواري لسه طويل بس متفائله في الله خير وواثيييك م الفوورز
طبعآ ساعات بحن لطعام الجاهليه منكرش بس برجع أقول الحمد لله الذي عافانا الصحه و الراحه النفسيه متتاقلش بمال و لا بيتزا سوبر سوبريم حتي و لا سينابون
نقطه إيجابيه لازم أذكرها لاني فعلآ محظوظه بيها …دعم المحيطين يا جماعه مهم جدآ …الحقيقه إن جوزي و أصحابي و أهلي كلهم بيشجعوني و سعداء بالنتائج و بيقولولي إستمري و ده بيفرق كتير خصوصآ في لحظات الضعف الإنساني و زي ما كلنا عارفين الإنسان إيه؟؟ دعيييف

في النهايه احب اشكرMostafa Helmy

الي مبخلش بتجربته الناجحه انه يشاركنا بيها و يساعدنا نغير حياتنا و باسم يوسف طبعآ و إيناس الشواف الي ضافتني للجروب الجميل ده و الأدمنز الي بيشوفوا الويل عشان ينظموا الدنيا و يمتصوا الناس و كل الناس الجميله الي بتكتب وصفات حلوه و بوستات مشجعه و بتشحن الجروب بطاقه إيجابيه و مبهجه …
أقول قولي هذا و أستغفر الله لي و لكم
الله الوطن الpbd

انضم معنا

facebook group

بحث

الأساسيات (مهم جدا)

Plant Based Diet Egypt
plant based diet
العسل

معرض الصور