الأساسيات, الصيام المتقطع, مصطفى حلمي

بقلم: مصطفى حلمي

يا جماعه..موضوع الصيام الناس بتتعامل معاه بطريقه قالقاني جداً.

عشان تبقوا فاهمين…الصيام المتقطع ده أنواع كتير…أخفهم هو ال16 ساعه صيام و8 ساعات أكل…وبعد كده الصيام يوم والأكل يوم.

الصيام مش دايماً معناه zero كالوريز…أنا شوفت فيلم وثائقي عن الراجل اللي “تقريباً إخترع” موضوع الصيام ده..أو على الأقل رجعه للوعي وعمل عنه أبحاث تقول فوايده..والراجل نفسه بيقول إن أيام الصيام دي هي أيام بياكل فيها أقل من 500 سعر..لكن بياكل (أو بمعنى أصح بيشرب شوربه).
يعني بياخد برضه سعرات، لكن قليله وفي صورة سائل عشان الجسم مايقعدش يستهلك طاقته في هضمها.

الصيامات اللي بقى بتقعد إسبوع أو أكتر..دي مش لعبه.
أيوه فيه ناس بتقعد سبع أيام تشرب ميه بس..وعاشوا…وعاملين فيديوهات على يوتيوب وكل حاجه..بس مش كلنا زي بعض.
لو حد عنده سكر وهو مايعرفش ممكن الصيام ده يعمل له مشاكل…لو حد ضغطه واطي ممكن يحصل له مشاكل، وفيه أسباب تانيه كتير ممكن تعمل مشاكل.

الناس اللي بنسمع عنهم عملوا صيام طويل، 20 يوم و30 يوم والحاجات دي..99% ماعملوهوش مع نفسهم في البيت بدماغهم كده.

الناس دي بتبقى في retreat مخصص للموضوع ده، مع ناس تانيه لها خبره في الحكايه وتحت إشراف ومتابعه طبيه مستمره.

وعشان تبقوا عارفين، مش بيشربوا مياه بس، بياخدوا معلقة عسل أو حاجه فيها سكر عشان تديهم شويه طاقة..وكمان مابيعملوش تقريباً اي مجهود بدني..وحاجات تانيه كتير، ماحناش خبراء ولا مؤهلين نفتي فيها.

كل صيامات المياه فقط دي مش تهريج، ومش لعبه، وممكن لو الشخص الغلط عملها، بدون إشراف، تتسبب في كوارث.

فيه حالات مسجله لناس ماتت بعد 21 يوم من غير اكل…أيوه فيه ناس تانيه كملوا 40 يوم، وفيه حالات كملت 70 يوم…لكن ماحدش عارف هو مين في دول، فمش طالبه حد يلعب قمار بعمره.

صيام الياه فقط ده مختلف عن الJuice Fasting أو الdetox أو الreboot اللي الناس شافته في Fat sick and nearly dead.

لأن الjuicing ده بيدخل للجسم فيه سعرات كتيرمن عصير الخضار والفاكهه..والعصير اللي بيستخدم فيها بيبقى pressed معمول في juicer مش في خلاط، عشان يقدر يستخلص الnutrients أو المغذيات اللي في كم كبير من النبات والفاكهه في كوباية عصير.

فده مش جذري أو خطر زي صيام الميه..واللي عايز يجرب الموضوع، يجرب ده الأول، وبرضه لازم يتأكد إن صحته كويسه وتستحمل، ويبقى فيه إشراف أو متابعه من حد، خصوصاً لو ناوي يعمله لفتره أكتر من كام يوم.

أنا بقول ده عشان أنا بقى لي كام يوم بشوف ناس عماله تتكلم إنها هتبدأ تصوم على المياه بس لمدد طويله، وسمعت حاجات مرعبه ومخيفه..وده خلاني اصلاً أشيل اللينكات بتاعة الصيام المتقطع من البوست المثبت..لأن ده أصلاً حاجه مش لكل الناس (وده كان التحذير اللي موجود من الأول) وماينفعش تتعمل عشوائي كده، وواضح إن فيه ناس هتسيئ إستخدامه، ولو ده ممكن يعمل كارثه لواحد ولا إتنين مش هيقروا فيه كويس ويخوضوا تجربه هم مش جاهزين ليها، يبقى قلته أحسن، بدل ما تحصل مصيبه، خصوصاً إن ده مش الcore بتاع موضوعنا.

مش لازم تغييرات جذريه زي نصحى نقرر ماناكلش لمده 40 يوم والحاجات دي…الإنقطاع عن المنتجات المضره لوحده هيضبط كل حاجه بشوية وقت..ولما تبقى عاداتنا كلها صحيه، ونبقى فاهمين إحنا بنعمل إيه كويس، نبقى نبحث ونقرا براحتنا في الحاجات الextra اللي ممكن نعملها.

انضم معنا

facebook group

بحث

الأساسيات (مهم جدا)

Plant Based Diet Egypt
plant based diet

معرض الصور