الأساسيات

ناس كتير قوي بتشارك بنتايج الرجيم معاها، ويا ريت ناس أكتر تعمل كده، سواء النتايج دي كانت فقدان وزن أو تحسن الحاله الصحية والشعور العام.

بس كذا حد بيقول إنه ماخسش!

عايز أرد في بوست يبقى موجود ونقدر نرجع له في الموضوع ده.

أولاً: زي ما قولت قبل كده، بلاش نتوزن كل يوم، لأن دي حاجه محبطه، وكمان نتايجها مش دقيقه، والأحسن إن يبقى فيه إسبوع على الأقل بين كل وزنه والتانيه.

ثانياً: لو أنت وزنك قريب من وزنك المثالي، طبيعي إن فقدانك للوزن يبقى أصعب من اللي وزنه زايد، وإن العمليه عندك تبقى أبطأ، وإنها تتطلب منك إنك تاكل سعرات أقل من غيرك (وده معناه في الدايت بتاعنا تقليل النشويات والمكسرات والبقول وتعويض الكميه اللي قللناها دي بخضار).

والسبب هو إن اللي وزنه قريب من المثالي، جسمه بيحرق طاقه أقل في ممارسه نشاطه اليومي من اللي وزنه زايد…فاللي وزنه زايد ده، ممكن ياكل 2500 سعر ويخس، لكن اللي وزنه مش زايد هيحتاج ياكل 2000 أو 1800 عشان يخس (على حسب الطول والوزن والنوع والنشاط اليومي).

ثالثا: أكتر سبب لعدم فقدان الوزن في الرجيم ده هو المبالغه في أكل النشويات أو المكسرات أو الفواكه…ودي حصلت لي أنا شخصيا في كذا إسبوع، وهي إني أستحلى الرز والمكرونه والفريك والبطاطس، والموز، وأنسى الخضار…هكررها للمره الألف، على الأقل نص كمية أكلك المفروض تبقى خضار، وخضار هنا مش بسله وبطاطا وفول، الخضار المقصود هنا هو أي خضار مش نشويات ومش بقول ومش حبوب. (خضار أخضر – طماطم – فلفل – بصل – كوسه – باميه – بتنجان – بروكلي – قرنبيط – فول نابت – فاصوليا خضرا…وغيرهم)

رابعاً: أنا عارف إن العيش مسموح، بس صدقوني بيتخن بشكل إحنا مش مدركينه
هاقولكم على حاجه…العيش ده عباره عن دقيق ورده (في مجمله) الدقيق فيه 364 سعر لل100 جرام – زي السكر بالضبط بالضبط بالضبط..يعني معلقه دقيق تساوي معلقة سكر!! – والرده فيها 224 سعر لل100 جرام…يعني لو العيش فيه دقيق ورده قد بعض (وده يبقى كويس لأن معظم العيش دقيقه أكتر من ردته) يبقى متوسط السعرات اللي في 100 جرام عيش تقريباً 300 سعر لل100 جرام، والرغيف عادي جداً يطلع وزنه 100 جرام مستريح أو في الحدود دي…فلما تاكل رغيفين في طقه، دول بسم الله الرحمن الرحيم كده 600 سعر..وطبعاً هتاكل الرغيفين دول بفول أو بعدس، مش بخيار وخس، ودول أصلاً سعراتهم عاليه…ف وأنت مش دريان، تلاقي نفسك فطرت فطار داخله في 1000 سعر حراري..اللي هو نص إحتياجك في اليوم!!
فالعيش مش ممنوع في النظام، بس لو هدفك تخس، يا قلله قوي، يا شيله خالص.

نقطه مهمه

جميل قوي إن فيه ناس بتعمل آيس كريم موز، وكوكيز الشوفان، وشوكلاطة الحبهان، وبسكويت البتنجان..كل ده عظيم، وبيصبر الواحد، خصوصا اللي واخدينه على إنه إسلوب حياه، مش رجيم وخلاص..

لكن لازم نفهم إن الTreats الجميله دي هي زي إسمها بالضبط Treats، يعني حاجه نسري عن نفسنا بيها مره أو إتنين في الإسبوع، وإحنا ملتزمين تماماً باقي الإسبوع…

لكن لو كل يوم هتضرب كلام من ده بعد الغدا وقبل العشا، ماتتوقعش إنك تخس..كونك نجحت تعمل أكل نباتي فيه سعرات مركزه، ده مش معناه إن جسمك مش بيعدها…

كله بيتعد، وكلكم متراقبين، والمكان كله محاصر.

البوست الأصلي كتب بواسطة: مصطفى حلمي في جروب الفيس بوك

انضم معنا

facebook group

بحث

الأساسيات (مهم جدا)

plant based diet

معرض الصور