فقدان الوزن, قصص نجاح, مصطفى حلمي

بما إننا في اليوم الأول من السنة الجديدة – كل سنة وأنتم طيبين- وده الميعاد السنوي للأمنيات والقرارات الحاسمه ووعود النفس اللي معظم الوقت مش بتعيش كتير، فأنا حاسس إن ده وقت مناسب للي أنا هقوله دلوقتي، يمكن حد تاخده الحماسه، وينفذه.

نبتدي بالصدمه.
قبل عيد ميلادي اللي فات في أكتوبر، طلعت على الميزان لاقيت وزني 190 كيلو.

أيوة..أنت قريت الرقم صح..190 كيلو، مش تسعين وزودت واحد بالغلط، و مش 100 وإيدي جات على ال9 بدل الصفر غصب عني، ومش 109 بس إتلخبطت في ترتيب الأرقام…190.

الرقم مرعب.

وغير إنه مرعب، معظم الناس اللي تعرفني كان صعب تتوقعه، لأن أنا بالرغم من إن أكيد باين عليا جدا الوزن، لكن طبيعتي إني وزني بيزيد بالتساوي في كل حته في جسمي، فدايماً الناس بتقدر وزني أقل بكتير من حقيقته.

فأنا وزني كان 190، بس شكلي موديل، بتاع 150 كيلو بالكتير قوي.

لكن مهما الناس إتخدعت في منظرك، جسمك مابيتخدعش، وعارف كويس قوي أنت وزنك كام بالجرام.

مش عايز أطول في الصعبانيات، بس كل أنواع المشاكل المصاحبه لوزن زي ده، كانت محسوسه، ومحسوسه جداً..من أول عدم قدره على الحركه، وعدم رغبه في النزول، أو ممكن تكون عدم قدرة على النزول أصلاً بس الواحد بيكابر، ومشاكل في الرجلين اللي كان بقى لها سنة بتورم، وكونت قرح (ودي مشاكل بتحصل عادة للناس اللي عندها تمانين سنة مش لواحد عنده 33 سنة) وقائمه طويله من الأشياء اللي ممكن يتكتب فيها كتاب.

طبعاً كواحد طول عمره تخين، أنا جربت كل الرجيمات الممكنه، واللي حضرتك سمعت عنها..رجيم السعرات الحرارية، وAtkins diet اللي هو عبارة عن قطع النشويات والتركيز على البروتين والدهون، والDukan Diet اللي هو عباره عن أيام متتاليه من أكل البروتين الحيواني فقط، ورجيم كيماوي، ورجيم بيلوجي، ورجيم أسلحة دمار شامل..أي حاجه أنت سمعت عنها، أنا غالباً جربتها.

النتيجه كانت غالباً بتبقى واحده…بخس شويه، بعد إسبوع أو إتنين أو تلاته، بزهق أو بتعب أو إرادتي بتضعف، ببوظ الرجيم..برجع وزني أزيد من الأول…كل مرة.

أنا لأسباب كتير يطول شرحها – بعضها فلسفي على رأي واحد صاحبي- كنت رافض أعمل عملية المعده..بس لما وزنك يبقى 190 كيلو، الفلسفه قد تكون رفاهية لا تملكها.

بقى من الواضح إني لازم أعمل حاجه..ووعودي لنفسي بالرجيم بقت يوميه، أو بعد كل وجبه باكلها..وبتطير وتختفي لما أجوع بعدها بكام ساعه..فترات الرجيم اللي كانت بتتعمل لأسابيع وساعات شهور، مابقيتش أقدر أعملها لأيام..ساعات أبدأ الرجيم الصبح وأبوظه على الغدا أو العشا.

فيه حاجه لازم تتعمل..وإلا العواقب سيئه، وسيئه جداً.

وبما إني لآخر لحظه بقاوم فكرة العملية، فكان لازم أشوف لي حل تاني، وإلا أقفل بقي وأعمل العملية وأنا ساكت.

صديقي باسم يوسف، من حوالي سنتين ونص، كان بدأ يعمل رجيم، أو هو “نظام حياة” إسمه Plant based diet..وباسم (زي ما أنتوا عارفين) مش تخين خالص، إنما هو عمله عشان يحافظ على صحته..ولما شرحلي الرجيم ده لأول مره، حسيت إنه راجل مجنون.

الرجيم يتلخص في الآتي:
1- الإنقطاع عن أي منتجات حيوانية (يعني مافيش لحوم ولا طيور ولا اسماك، ولا لبن ولا جبن بجميع انواعها)
2- مافيش دهون بجميع أنواعها..يعني لا سمنه ولا زبده ولا زيوت (أيوة، ولا حتى زيت زيتون..شايفك ياللي بتستعبط)
3- مافيش أي مأكولات مركزه أو محسنه أو محفوظه (يعني مافيش معلبات، مافيش خلاصة ديبس الرمان ومستخرج البلح ومنقوع الماعرفش إيه، ولا دقيق أبيض ولا مياه غازية حتى الدايت)
4- مافيش ملح (أن أن أن آآآآن)
5- مافيش سكر.

أومال فيه إيه يا جدع؟؟…حرام عليك..فيه إيه؟..أتنفس عادي طيب؟

بما إن باسم جراح قلب، فهو ماعملش كده من فراغ..الموضوع له أصل، واللي خلاه يعمله هو معرفته بقصص ناس كانوا مرضى بأمراض عويصه من اللي بيقولوا إن مالهاش علاج، زي مرض صعب جداً إسمه MS وأمراض زي السكر (Type 2 diabetes) وبعض أنواع السرطان، ومرضى قلب، وبالأخص المرضى بـ Autoimmune Diseases وخفوا تماماً على النظام ده، وإستغنوا عن أدويتهم كلها أو معظمها، في حالات أشبه بالسحر أو المعجزه.

بالرغم من إن باسم أصلاً جراح قلب وصاحبي وكل حاجه، الموضوع كان يصعب تصديقه..فلما سمعت منه القصه دي، دخلت على النت وقعدت أقرا عن الPlant Based Diet ولاقيت الكلام كله صح، وحقيقي…والموضوع مش بس بيخسس…لكن الناس بتعمل تحاليل قبل النظام ده، وبعده بست أسابيع، وبيشوفوا نتائج مذهله..زي نزول الكولسترول لمعدلاته الصحية (بيبقى فوق ال300 وينزل لـ 150 عادي جداً في أسابيع وبدون أدوية)..ونزول السكر والتخلص من أدويته (وفي حلالت الإعتماد الكامل على الإنسولين بيتم تقليل الجرعه بشكل كبير جداً)..وصمامات القلب المهترئه بترجع تلئم تاني…سحر حقيقي.

إقتنعت بإن النظام صحي ومظبوط..لكن زي مليون حاجه صحيه ومضبوطه، مش معنى إنها صح، إني هعملها.

وهنا نرجع تاني للرقم..190 كيلو!!

الإختيار كان يا عملية..يا Plant Based Diet

وبما إني مش عايز عمليه..فعملت الدايت.

المفاجأه السعيده، هي إن الدايت ده مش عباره عن سلاطه خضرا…أنا مش أرنب…أنا بحب الأكل – غالباً أكتر منك- ولو الموضوع سلاطه خضرا، ماكنتش عرفت اعمله تلات أربع أيام.

أنا باكل رز ومكرونه وبطاطس وبطاطا وفول وعدس وبقوليات، وممكن عيش بلدي (بس مابكترش منه عشان فيه دقيق أبيض برضه)..وكل أنواع المكسرات (غير مملحه) وكل أنواع الخضار والفاكهه.

الكاربوهيدرات المحببه.
مطبوخه بدون دهون ولا ملح صحيح..لكن لسه جميله.
جرب تحط بطاطسايه متقطعه شرائح في الفرن، وترش عليها فلفل وتوابل، وطلعها..هاتحس إنك بتاكل بطاطس محمرة..رجيم أو مش رجيم، هاتاكلها.

والخبر السار الآخر هو إن بعد تلات أسابيع، مابتحسش بأي إفتقاد للملح..زي أما تبطل سكر في الشاي..بعد فتره بتتعود، وبتحس إن الشاي حلو من غير سكر..لأن الإستطعام عندك بيتغير.

الحقيقه إن أنا باكل أكل، مش متخيل إني ينفع أخس وأنا باكله…باكل على الغدا طبق مهول من المكرونه معموله بصلصه طماطم فريش وخضار..كل يوم..وأتوزن، ألاقي نفسي خاسس.

من عيد ميلادي (9 أكتوبر) لآخر مره إتوزنت من يومين..خسيت 28 كيلو..من غير ما أتعذب، ولا أجوع.

إتعسفت شوية في أول كام إسبوع من موضوع الملح بالذات…آه إتعسفت..بس خلاص، بقيت بحب الأكل اللي باكله.

ممكن تقعد تعيط وتقول نفسي في جبنه..نفسي في لحمه…بس الحقيقه إن طالما بتاكل أكل مشبع ومريح زي الرز والمكرونه والبطاطس، فالتركيز على اللي أنت مابتكلوش ده، مجرد فراغة عين…أنا طول عمري باقول، ليه يا رب ماسيبتليش نوع أكل واحد بحبه مابيتخنش..إتضح إنه كان سايب لي كتير..بس أنا كنت بحمرهم.

الرز مابيتخنش..إسأل مليار ونص صيني..المشكله في اللي بيتطبخ بيه الرز واللي بيتحط عليه.

البروتينات يا جماعه موجوده في النباتات والمصحف، مش في اللحمه بس…البقول كلها بروتين (فول – عدس – فاصوليا بيضا وغيرهم) وفي المكسرات (سوداني – لوز – كاشو..وغيرهم) ..فلما تاخدها من النباتات بتاخد فوايدها كامله، أحسن ماتاخدها من اللحوم وتاخد معاها كولسترول ويوريك أسيد وسد شرايين ورفع ضغط.

الحيوانات أصلاً بتاخد البروتين من النباتات..وإحنا بناكل البروتين اللي في النباتات عن طريق لحمها..طاب ليه؟..ماتاكل النباتات على طول يا ريس!

عامة، أنا ممكن أتكلم أربع خمس ساعات في الموضوع ده، فأنا هوقف هنا..بس اللي عايز أقوله إن أنا مش كاتب الكلام ده عشان حد يقول لي برافو، أو عشان هبدأ أشارك الناس رحلة الخسسان بتاعتي..أنا مش عايز النوع ده من الضغط النفسي، إن فيه ناس مستنيه تعرف أنا بقيت كام كيلو، أو لازم انزل صورتي في الجيم وإلا “الFans” هايقلقوا..أنا لو عليا كنت عملت الرجيم في صمت، وفي الآخر أنا اللي هتحمل فشله او نجاحه لوحدي..وأنا أصلاً مش عايز الموضوع يتربط بيا..لأن النظام ده ناجح..سواء أنا كملت فيه ولا ماكملتش – والحقيقه إني حتى مش عايز أبوظ..لأول مره في حياتي، لا تعبان في الرجيم، ولا ببوظ وجبه، ولا كلام من ده خالص – لكن بغض النظر عن النجاح أو الفشل الشخصي..This works.

أنا بس صعب عليا إني ألاقي نظام سحري المفعول زي ده، وماقولش عليه للناس اللي يمكن في نفس موقفي ومش عارفه تعمل إيه…صعب عليا إن رجلي اللي قعدت سنة وارمه وماخفتش بالأدوية وبالكريمات وبالدكاتره، تخف على الرجيم ده في إسبوع (سبع أيام) وماقولش…صعب عليا إن نومي اللي إتظبط وبقى منتظم، ونفسي اللي بقى منتظم وحالتي النفسيه اللي إتظبطت لمجرد شوية إختيارات في الأكل، وأفضل متكتم عليها.

شوفوا فيلم إسمه Forks Over Knives أو إقروا كتاب إسمه The China Study..فيهم شرح وافي للموضوع.

وده السايت بتاع Forks Over Knives فيه قصص نجاح، ووصفات الأكل…بصوا على وصفات الأكل بالذات، عشان تعرفوا إنه أكل حلو وإني مش بهرتل…أنا عندي 190 كيلو يثبتوا إني مابهزرش في موضوع الأكل ده!!

http://www.forksoverknives.com/recipes/

تحديث 1:
عشان فيه ناس كتير سألت عن كمية الأكل اللي ممكن ياكلوها..الإجابه هي كل لما تجوع وبطل أكل لما تشبع…الأكل الدسم المركز بيضرب الPleasure center عندك في المخ، فبيخليك تاكل حتى بعد ما تشبع، عشان جسمك عمال يفرز في هرمونات بتخدرك وبتقولك إن البيتزا دي جميله وفيها سعرات كتير..لأن دي الطريقه اللي الجسم كان بيعرف بيها الإنسان الأول إنه المفروض ياكل الثمر مش ورق الشجر..فكل ما تاكل حاجه فيها سعرات كتير، كل ما جسمك يبسطك اكتر..عشان كده كل الأكل الحلو اللي بيمزجك بيتخن..وكل الأكل اللي مابيتخنش مابيبسطكش..فأنت لما تبطل الأكل اللي فيه سعرات مركزه، هتلاقي مفسك مش بتأفور في الأكل من نفسك..بتبطل لما تشبع لوحدك.

الحاجه التانيه:
الكاربوهيدرات (النشويات) صديقتك، مش عدوتك..النسبه المثالية المفروض تكون بالتقريب كالآتي: 80% نشويات وبقول و10% خضار و10% فواكه.
النسب دي من السعرات الحراريه..مش من الكميات.
يعني لو هتاكل 2000 سعر حراري في اليوم..1600 منهم ييجوا من النشويات والبقول..و200 من الخضار و200 من الفاكهه

ماتقعدش تحسبها بالورقه والقل..إوزنها في دماغك بس كده..لو لاقيت نفسك بتاكل بطاطس من أول اليوم‘ إعرف إنك المفروض الوجبه اللي جايه تاكل شوية سلاطه وشوية فاكهه…في معظم الوقت هتلاقيها بتيجي لوحدها..ماتعسكفش نفسك..ومش لازم تبقى مثالي قوي.

تحديث 2: مصطفى نجح في فقدان 43 كيلو في خمس شهور ولسه مكمل..

انضم معنا

facebook group

بحث

الأساسيات (مهم جدا)

plant based diet
العسل

معرض الصور