قصص نجاح

٤٠ يوم يا جماعه!!! ٤٠ يوم!! انا ايه وائل بقالي ٤٠ يوم من غير اي حاجه مُضرّه تدخل معدتي!!
منغير سكريات، بعد ما كان الاكلير و ام علي و التشيز كيك بيتّاكل بمُعدل يومي.
منغير ملح، بعد ما كنت باحط الملح في طبقي قبل اصلا ما اعرف انا هاكل ايه و شبه باغمسه باي حاجه باكلها.
منغير لحوم او فراخ او اسماك، الله يمسيه بالخير طبق الستيك بالجمبري، مش عارفهcapital grill هايعمل الطبق ده لمين بعد كده..يا عيني عليه..كنت باكسّبه دهب
٤٠ يوم منغير ما نبقي خارجين و ابدأ افكر هاناكل ايه، منغير مفهوم ان خروجه يعني اكله
ايام مسحت فيها ارقام مطاعم قد كده، و حل محلها رقمين بس، الخضري و العطار، ربنا يبارك فيهم و يكتّر من امثالهم grin emoticon
اللي جي ده بقي يمكن كتير مايستوعبوهوش لانه نظريا مالوش علاقه، بس ده فعلا اللي حصل
انا علاقتي باهلي اللي بقالي كتير باحاول اضبطها اتحسنت جدا جدا لسببين
١. حالتي الصحيه و تخني كان دايما مأثر في نفسيتي جدا و مخليني شخصيه عصبيه مع أهلي، و كأني باعاقبهم علي اللي أنا فيه، مع إن دي طبعاً مش مشكلتهم، إحساسي بعدم الرضا عن نفسي، كنت حرفياً بابُخّه في وش أي حد حواليا، ده اتغير تماما، دايماً بيقولوا إن الواحد لازم يحب نفسه عشان يعرف يحب و يسعد اللي حواليه، ماكدبوش، فعلا ماكدبوش، اكتشفت إن منتهي حب النفس إن الواحد يخاف علي صحته و يعملّها ألف حساب، لمّا أنا عملت كده فعلا نفسيتي هديت و بالتالي معاملاتي اتغيرت جدا مع أهلي.. ده غير ان واللللله اكتشفت ان الدهون و الاكل اللي احنا مبطلينه بيأثر علي النفسيه جداااااا..
٢. أهلي نفسهم بقوا يبصولي نظره مختلفه، لان تقريباً دي أول حاجه في حياتي أقرر اعملها و فعلا اعملها، بقوا شايفنّي انسانه قويه و صبوره و ثابته، فا بعد ما كانوا مش مستوعبين اللي باعمله بقوا مستوعبينه كويس جدا و أبويا تحديدا بقي أي مكالمه ليه مع واحد صاحبه يجيب سيرتي فيها و يتكلم عنّي كأنّي hero و طول ما هو مسافر يشجّعني في كل مكالمه، و طول ما هو هنا بيشجّعني تقريبا كل لحظه
اهلي تقبلوني، تقبلوا فكره إنهم مش هايسألوني هاتاكلي ايه و احنا في مطعم لو متأكدين ان اكله مش هايناسبني.
في الأول كانوا بيعملوا حسابي في الأكل اللي بيجبوه من بره
انا اكتر اكله بحبها الحواوشي، فا بابا تعمّد في الاول يجبلي كل اكلاتي المفضله، و تاني يوم بعد اكله الحواوشي دي قاللي هاقوللك علي حاجه بصراحه (انا قلت انهارده هاجيبك الارض و اتحديت نفسي انك هاتاكلي معانا، و اتفاجئت جدا انك ما اكلتيش، يعني انتي فعلا عايزه كده فربنا معاكي و يوفقك)
تقبلوا فكره اني خلاص بره الحلقه المفرغه دي…
انا مش نفس الشخص اللي لما صاحبتي قالتلي علي النظام كانت اول حاجه اقولها علي النظام ده.. مستحيل طبعا اقدر اعمل كده انتي بتهرجي!!
انا مش نفس الشخص اللي لما كان حد يقوله انا مابكلش فراخ او لحوم او اسماك يبقي ردي و للاسف
(اُمال بتاكل ايه!!!)
انا مش نفس الشخص ده
انا حصللي تغيير كبير قوي و اغلبه نفسي
انا دلوقتي اكتر في كل حاجه حلوه
السعاده، الصحه، الثقه في النفس، السيطره و القوه
و اقل في الوزن ب ٨ كيلو..فارقين معايا جداااااا،، في شكل وشي و في هدوم طلعتها كنت بطلت البسها من زمن
اخيرا الاكل بالنسبالي مابقاش شهوه، مابقاش عشق..بقي حاجه عاديه..اخيرا الحمد لله..
بالمناسبه يمكن حد يستفيد من الموضوع ده..انا خسيت ٨ كيلو، و بعدين رجعت منهم ٢ في ثلاث ايام عشان كنت سايبه الخضار خالص و مقضياها نشويات و مكسرات بس الحمد لله نزلتهم تاني، فا خلوا بالكوا، و انتوا مره في مره هاتفهموا طبيعه الاكل و هاتعرفوا طبيعه جسموكوا و تعرفوا تتعاملوا معاه.
الحمد لله
مكملين عشان نبقي اكثر سعاده و صحه

انضم معنا

facebook group

بحث

الأساسيات (مهم جدا)

Plant Based Diet Egypt
اعراض الانسحاب
plant based diet

معرض الصور