الأساسيات

ناس كتير بتسأل: أبدأ ازاي؟

اللي بيبدأوا النظام دايماً بيسألوا ينفع نتحول تدريجياً..ولا لازم نقطع مرة واحده؟

طبعاً ينفع.. كل شيء ينفع..

الأكيد إن كل ما تغير طريقة أكلك وتتحرك ناحية نظام أكثر نباتيه وأقل في اللحوم والألبان والسكر والأكل المصنع والدهون، ده هيكون أحسن وله فوايده.

فكل واحد يعمل الأنسب له..لو شايف إن أسهل له يبطل حاجه حاجه، أو ياخدها بالتدريج، يعمل كده..هو عارف نفسه أكتر من أي حد تاني.

لكن رأيي الشخصي: إن قطع كل المنتجات دي مرة واحده أحسن.

السبب هو إن طبيعة معظم الناس هي عدم الصبر على تغيير العادات..أنا لو كنت عملت النظام ده، وماشوفتش نتايج في أول إسبوعين، ماكنتش كملت فيه..مانا ماينفعش أبقى جاي على نفسي ومبطل حاجات أنا بحبها وكمان مافيش نتايج وعايزيني أكمل!

لو قررت مثلاً تبطل اللحوم، بعدبن منتجات الألبان، وبعدين السكر وبعدين الدهون…كل إسبوع أو كل إسبوعين تقوم مبطل حاجه،
اللي هيحصل إنك هتقعد في الإسبوع اللي مبطل فيه لحوم حاسس بحرمان لأنك مانعها…ولأنك لسه بتاكل ألبان وجبن وسكر ودهون، بعد الإسبوع ده، مش هتشوف نتايج قوي،
ومش هتخس، ولا هتحس بتحسن كبير، وبعد كل ده إيه بقى الجايزه اللي هتاخدها؟…إنك تقطع حاجه جديده.

فتعيش إسبوع كمان في حرمان من منتجات الألبان مثلاً..
وعلى آخر الإسبوع ده..مافيش نتايج قوي، لأنك لسه بتاكل أكل مصنع وسكر ومحمر ومقلي..فيبقى إسبوعين حرمان ومافيش نتيجه،
على آخرهم جايزتك إيه؟..تبطل حاجه تالته!!..وهكذا.

على ماتبتدي تشوف نتايج وتحس بفرق في الصحه أو على الميزان بالطريقه دي، مش هيكون قبل شهر..ومعظم الناس مش هتستحمل شهر بلا اي نتايج محسوسه، وهييأسوا ومش هيكملوا.

فبدل تطويل ومط فترة الشعور بالحرمان دي..حرمان بحرمان، إقطع كله مره واحده، على الأقل لما تعمل كده، إسبوع أو عشر أيام وهتكون شوفت نتايج كويسه..سواء وزن إتغير، أو شعور بالخفه والراحه في البطن وإنتظام في دخول الحمام، و، و، و…
وده هيخليك تتشجع وتكمل رغم إن الأكل لسه مش عاجبك، ورغم إنك ممكن تكون لسه مفتقد حاجات..مافيش حاجه بتشجع أكتر من النتايج، وهي الحاجه اللي ممكن تشيلك في فترة الضيق والتكدير الأولى لغاية ماتعدي للمكان اللي بتبدأ فيه تتعود على النظام وتحب الأكل، وتستمتع بحياتك من غير ما تحس إنك عامل نظام معين أصلاً.

البوست الأصلي كتب بواسطة: مصطفى حلمي في جروب الفيس بوك

انضم معنا

facebook group

بحث

الأساسيات (مهم جدا)

Plant Based Diet Egypt
اعراض الانسحاب
plant based diet

معرض الصور