الأساسيات, القولون, مصطفى حلمي

بقلم: مصطفى حلمي

مش غريب إن نصنا عنده مشاكل قولون، أنا شخصياً وجع القولون وداني المستشفى قبل كده، لأن من كتر شدته كنا فاكرينه حاجه تانيه (مغص كلوي – زايده – حاجه فرقعت جوه وإحنا مش عارفين دي إيه)..وكان لازم أروح أعمل أشعه، وسونار (وأنا كرشي مايفرقش كتير عن واحده حامل في توأم)..وفي الآخر الدكتور الحمد لله طمنا إنه ولد…أقصد إنتفاخ.

الدهون واللحوم من أكتر الحاجات اللي بتتعب الجسم في الهضم..وفيه ناس بتتعب من البقول كمان..بس معظم مشاكل الهضم متعلقه باللحوم والجبن والدهون..عشان كده مثلاً أي حد عنده المراره، بياكل بنصيحة الطبيب أكل تقريباً Plant Based Diet..وحتة جبنه رومي ممكن تخليه يصوت.

بس من تجربتي الشخصيه، مع إني كنت فتره لما بدأت النظام بفتري في أكل حاجات مهيجه للقولون، زي الفلفل الحراق، والفول والعدس بكميات، والكرنب وخلافه..ماجاليش اي وجع قولون تماما..والحقيقه – وانا آسف على التفاصيل المقرفه – إني بقيت كمان بطل العالم في دخول الحمام.

مافيش حاجه إسمها إمساك..مافيشح معاناه خالص، مع إني كان بقى لي شهور عندي إمساك شبه مزمن، وبعاني في دخول الحمام في حالات أشبه بالولاده المتعثره، وكنت بحس إن المفروض يتعمل لي قيصريه لأن شكلها كده مش هتخرج طبيعي.
ده تأثير الألياف، لما تاكل ألياف كتير (اللي في الخضار) موضوع الحمام ومشاكل تانيه كتير في الهضم بتتظبط.
باسم كان شرح لي مره إن البطانه بتاعة الأمعاء بتتغير بعد 21 يوم تقريباً، وبالإمتناع عن اللحوم والدهون ومنتجات الألبان، بتبقى قويه وصحيه، وأكثر قدره على التعامل مع نوع الأكل اللي أنت بقيت بتاكله.

ناس كتير هنا ممكن تأكد على كلامي ده، إن كان عندهم مشاكل قولون عنيفه، وبعد فتره من الإنتظام في النظام إختفت أو قلت جداً.
فاللي خايف من البقول، يقللها جداً أول إسبوعين تلاته، وواحده واحده، يزودها، مع تغير جسمه وقدرته على الهضم ومنع اللحوم والدهون والألبان ومنتجاتها، هيقدر بعدها ياكل البقول عادي جداً، ويزودها في أكله واحده واحده.
شفيتم.

انضم معنا

facebook group

بحث

الأساسيات (مهم جدا)

العسل
The Protein Myth
plant based diet

معرض الصور