الأساسيات, السرطان, السكر, تصلب الشرايين, سؤال وجواب

بقلم: أحمد طارق العادل

Fruits-and-Vegetables[1]

بقالى حوالى سنة و نص كل ما اقعد جمب حد اعرفه أو معرفوش أقول له أو أكون عايز أقوله :
والنبى كُل خضار و فاكهة كتير، طب بص قلل اللحوم والألبان والبيض، طب أقولك خد فيتامين سى كل يوم سهل ورخيص ايه رأيك؟
فييهز دماغه أكنه اقتنع ، و بعد كده ينفض لى !
الناس اللى تعرفنى بيندهشوا ليه أنا بقيت نباتى، و بتسأل دايما : ليه يا تيكا تعمل كده ، فبقول لهم أصل وقعت بالصدفة – أو قدرا – فى تفاصيل علمية كتير كلها بتؤدى إلى نفس النتيجة ، إنك المفروض تاكل نباتات كتير ، أكل حقيقى ، و تبعد عن اللحوم و اللبن و البيض .
البداية.. عند “لينوس بولينج” يا جماعة ، كيميائى ومعاه جايزتين نوبل ، نشر م بين 1989 و 1992 شوية أبحاث عن تصلب الشرايين ممكن تخلى المرض يختفى تماما،عن سببه الحقيقى بسيط و بيرجعنا للخضار و الفاكهة ، يعنى Plant-based diet
تصلب الشرايين atherosclerosis هو أساس أكتر مرضين بيموتوا حاليا ، أمراض الشرايين التاجية Coronary artery disease و الجلطة الدماغية Stroke .
حوالى 13 مليون كل سنة أو أكتر بيموتوا من الاتنين دول بس .

يوم 1 يناير ، مصطفى حلمى كتب البوست ، ناس كتير أوى اتفاعلت معاه ، و ده خلانى أحس إن فيه أمل الناس تغير نظام أكلها ، فأنا هكتب هنا اللى عرفته و خلانى نباتى ، هو مش هيفرق معاك لو أنت نباتى خلاص ، لكن ممكن يخليك توعى الناس حواليك بأهمية الخضار والفاكهة فى منع الأمراض، لأن تصلب الشرايين مرض سهل أوى تمنعه بس صعب تعالجه، واللى دخل المعمل وأثبت الكلام ده هو “لينوس بولينج” شخصيا

دى الخطوط العريضة للحكاية ، حكاية فيتامين سى و3 عصور لفهمنا لأهميته ، أنا مش بتكلم فى البوست ده عن ليه اللحوم و الألبان مُضرّة ، لكن بتكلم عن ليه أكل الخضار والفاكهة مفيد .
خد نفس عميق ، و تعالا خد غطس..

1

فيتامين سى مختلف عن باقى الفيتامينات فى إن كل الحيوانات بتقدر تصنعه بكميات كبيرة فى جسمها من الجلوكوز ( أبسط سكر ) برقم يتناسب مع وزنها ، مثلا الفأر لو كان وزنه زى وزن الإنسان هيكون بيصنع يوميا 1800 -4100 ملليجرام ! ، كل الحيوانات بتصنعه بنسبة من حوالى 2,000 ل 20,000 ملليجرام ، و الحيوانات عندها قدرة لو هى تحت أى Stress تزود التصنيع ل 10 أضعاف الرقم الأساسى
احنا أجسامنا مش بتصنع فيتامين سي!
احنا و باقى الرئيسيات ( غوريلا ، قرود ) و خنزير غينيا ( و هو نوع من القوارض) ، عشان كدة محتاجين ناخده من الأكل كل يوم .
احنا محتاجين اد ايه كل يوم ؟
الجرعة المقترحة اليومية RDA لفيتامين سى من حوالى 10-90 ملليجرام ، ولاختيار الرقم ده قصة غريبة .

2

الاسقربوط Scurvy ، الكلمة الغريبة على السمع دى ، كانت مرض مميت بيجى للناس، حوالى مليون ماتوا بسببه م بين 1600 و 1800، تخيّل ، الأمر كان محير و كانت فيه نظريات كتير
علم الكيمياء اتطور، وعرفنا إن فيه 3 مكونات أساسية فى الأكل، بروتين و كربوهيدرات و دهون ، بس الحيوانات اللى كانت بتتغذى على التلات حاجات دول فقط ( أكل متصنع ) كانت بتمرض و تموت ، إذن فيه حاجة ناقصة !
كاسيمر فانك Casimir Funk أعلن نظرية الفيتامينات سنة 1912 ، قال إن فيه عناصر كيميائية موجودة فى الأكل بكميات قليلة ، وجودها بيعمل وظيفة ، غيابها بيعمل مرض ، و الجسم مش بيصنعها ، سماها فيتامينات!
واعتبر إن الاسقربوط هو مرض نقص deficiency disease و إن العنصر الكيميائى اللى موجود فى الخضار و الفاكهة و بيمنع المرض ده اسمه فيتامين سى .
البحث بدأ عشان يعرفوا تركيب الجزئ ده ، ناس كتير اشتغلت فى الموضوع ، و فى سنة 1937 الموضوع خلص بجايزتين نوبل لأهميته ، واحدة منهم ل ألبرت جيورجى Albert Szent-Gyorgyi فى الطب ، و هو يعتبر مكتشف فيتامين سى و هو اللى سماه أسكوربيك أسيد Ascorbic acid يعنى اللى بيمنع الاسقربوط
و اختفى المرض !

3

وهو ده أساس إن الجرعة المقترحة اليومية RDA لفيتامين سى من حوالى 10-90 ملليجرام ، المقصود بالرقم ده جرعة مقترحة يوميا عشان نمنع الاسقربوط ، بس كده .
فيتامين سى كميته بتقل كل ما الأكل يطبخ أكتر و أكتر ، يعنى لو كل أكلك مطبوخ فى الغالب بيخش جسمك كمية قليلة، ولكنها كفاية عشان تمنع الاسقربوط .

4

فيه كيميائى اسمه اروين ستون Irwin Stone شد انتباه لينوس بولينج و ألبرت جيورجى إلى إن كل الحيوانات بتصنع كمية كبيرة جدا من فيتامين سى، بتصنع من 2000 ل 20,000 ملليجرام يوميا!
هو بالنسبة لكل الحيوانات مش فيتامين لأن أجسامهم بتصنعه .
هل منطقى إن أجسامنا محتاجة بس من 10 ل 90 مليجرام كل يوم!
فيه فرق كبير ، و ده اللى أنا بحاول أشد انتباهكم ليه النهاردة
يعنى لو أنت مثلا أكلت نص كيلو جوافة هيدخل جسمك 1140 ملليجرام فيتامين سى و معاهم 340 كالورى بس ، متخيل .
هل ده صح و لا غلط ، كتير و لا قليل ، مهم و لا مش مهم ، السؤال الأساسى هنا هو
احنا أجسامنا محتاجه اد ايه فيتامين سى كل يوم عشان نكون بصحة كويسة ؟؟ هل احنا محتاجين
0 ( بمعنى إن الموضوع ده مش مهم )
من 10 – 90 ملليجرام
من 1000-9000 ملليجرام
ده المقصود بال 3 عصور لفهمنا لإجابة السؤال ده ، و ده السؤال اللى لينوس بولينج كان بيسأله للناس فى آخر 30 سنة من حياته ، و إجابته ودته لحل مشكلة تصلب الشرايين ، مرض سهل أوى تمنعه لكن صعب جدا تعالجه للأسف .
كل إجابة منهم فى عالم مختلف ، فكّر فيها كده .

5

اروين ستون بيقول إن الطبيعة الأم غلطت ، البشر كلهم فيهم خلل جينى ، عيب وراثى في البشر و الغوريلا و خنزير غينيا بس ، احنا الوحيدين اللى أجسامنا مش بتصنع فيتامين سى فممكن يجيلنا الاسقربوط و نموت منه ، باقى الحيوانات لأ ، باقى الحيوانات محظوظة !
محظوظة لأنها كلها بتصنع فيتامين سى بنسبة كبيرة من 2,000 ل 20,000 ملليجرام ، هو استنتج إن أى إنسان محتاج فيتامين سى كتير زيهم عشان يكون فى صحة كويسة ، محتاج من 3000 ل 5000 ، و إن الكمية الكبيرة دى مستحيل جسمك ياخدها طبيعى من الأكل ، مستحيل ! بس لأن الكيمياء اتطورت احنا أخيرا ممكن نصلح الخلل الجينى ده ، احنا هنعدل ع الطبيعة الأم وناخد فيتامين سى كمكمل غذائى !

6

مكمل غذائى ؟؟؟؟ نعدل ع الطبيعة ؟؟؟؟؟ أنت مجنون ؟؟؟؟ الطبيعة هى الصح !
الناس كلها هاجمته ، انت نظريتك متناقضة يا كابتن ، منين بتقول نرجع للطبيعة ، و منين بتقول احنا هنعدل ع الطبيعة ! ، م يمكن الإنسان محتاج كميات قليلة منه بس ، يمكن الإنسان مختلف ، يمكن احتياجنا الطبيعى لفيتامين سى قليل ، من 10 ل 90 ملليجرام بس .
اروين ستون انكمش ، كلهم بيهاجموه ، اروين ستون يرتعش ، اروين ستون كيميائى مغمور محدش يعرفه ، كيميائى مش عارف يطلع من ال paradox اللى زنق نفسه فيه ، راح جرى على ألبرت جيورجى Albert Szent-Gyorgyi ، ألبرت واخد نوبل لأنه مكتشف فيتامين سى أكيد هيساعده، ، قال له : الحقنى يا ألبرت ، أنت أكتر واحد عارف فيتامين سى ، أنا اتزنقت !
مكتشف فيتامين سى قال له : أنا معاك إن البشر محتاجين فيتامين سى أكتر عشان صحة أحسن ، أنا طول عمرى عندى الإحساس ده و أنت أكدت لى صحته ، بس ال paradox اللى زنقتنا فيه ده ملهوش مخرج ، الطبيعة الأم م بتغلطش ، روح ل لينوس هو معاه جايزتين !!
راح جرى على “لينوس بولينج ” وقال له : الحقنى يا لينوس ، أنت معاك جايزتين نوبل ساعدنى ، أنا اتزنقت ، طلعنى من ال paradox ده !
فيتامين سى فيتامين و لا لأ ؟
الجسم محتاج كتير ولا قليل ؟
“لينوس بولينج ” الآن 69 سنة ، سنة 1970 ، الوحيد على الكوكب اللى معاه جايزتين نوبل بمفرده ، اتدخل فى الموضوع ، عجوز كأنه جاندالف و معاه برتقانة سحرية ، قال لهم : مين اللى قال طبيعى ، كلهم استخبوا منه و محدش رد ، زعق فيهم جامد : طبيعى ، هما عايزين يعرفوا الطبيعى ، طب تعالوا نشوف الطبيعى ، و سألهم جميعا سؤال بسيط .

7

الإنسان كل يوم بيفضل ياكل لغاية م ياخد ال 2500 كيلو كالورى اللى هو محتاجهم عشان يعيش و يشبع ، صح ؟
ممكن تاخد ال 2500 من أى مصدر أكل ، عيش ، حبوب ، لحوم ، فاكهة ، خضار ، محلول جلوكوز..آيس كريم ، بيج ماك ، صح ؟
( و افتكر إن فيتامين سى كميته بتقل كل م الأكل يطبخ ،و مش موجود فى الأكل المتصنع زى العيش )
طيب ، لو أنت عايش طبيعى زى الإنسان البدائى بتاكل أكل كله نباتات و مش مطبوخ raw هيدخل جسمك فيتامين سى اد ايه مع الأكل ؟ ال “طبيعى “.
لينوس مسك كتاب رسمى فيه كمية الكالوري و فيتامين سى و B1 و B2 و B3 اللى فى الأكل ل 366 أكلة طبيعية و متصنعة ، منهم 110 احنا بنأكلهم من غير طبخ raw و حسب المتوسط عشان يعرف ال “طبيعى ” فى الأكل ، ايه هو ال “طبيعى ” ، و قارنهم بالجرعة المقترحة اليومية .
الثلاث فيتامينات B1 ,B2, B3 المتوسط بتاعهم 41 , 5.4 , 5 ملليجرام بالترتيب ، مفيش مشكلة .. هو ده تعريف كلمة فيتامين أصلا ، مادة الجسم مش بيصنعها لكن محتاجها ، و موجودة فى الأكل بكمية قليلة .
بُص على الجدول كده شوف المتوسط بتاع فيتامين سى ، شايفه ، واخد بالك ؟
!!!!! 2300 ملليجرام
فيتامين سى –أسكوربك أسيد : مادة الجسم مش بيصنعها لكن محتاجها ، و موجودة فى الأكل بكميات كتيييييييييييييييييرة
كمية كتيرة يعنى مش فيتامين !
هو ده ال “طبيعى ”

8

أنا متخيلهم هما التلاتة عواجيز و بيرقصوا فى المعمل ، و بيضحكوا ، بيشربوا فيتامين سى ، بيرقصوا و قاعدين بيقولوا : الطبيعى طلع 2300 ، عليك انت حركات يا لينوس ، الطبيعى طلع 2300 ، مفيش pardox و لا حاجة ، فيتامين سى طلع مش فيتامين !!
لينوس و هو بيضحك و بيمسح الدموع من عينه من كتر الضحك قال هم : طب تعالوا كده نشوف ال upper limit ، الحد الأقصى بالمرّة .
فيه 14 نبات من ال 110 نبات غنيين بفيتامين سى ، فيهم من 5000 ل 16,500 ملليجرام فيتامين سى لكل 2500 كيلو كالورى !!
المتوسط بتاعهم 9500 ملليجرام !
يعنى لو أنت أكلك كله “طبيعى ” جسمك المفروض ياخد من الأكل الطبيعى أكتر من 1000 ملليجرام كل يوم ، المتوسط الطبيعى 2300 ، و ممكن توصل حتى 9500 ملليجرام كل يوم طبيعى .
هو ده الطبيعى ، هو ده العصر الثالث . العصر الطبيعى .
تعالا ، اتفضل ، شمر البنطلون ، خش برجلك اليمين
قبل م تخش أحب أفكرك بالسؤال ، احنا أجسامنا محتاجه اد ايه فيتامين سى كل يوم عشان نكون بصحة كويسة ؟؟ ايه هو الطبيعى اللى أجسامنا محتاجاه ؟ ، هل احنا محتاجين
0 ( بمعنى إن الموضوع ده مش مهم )
من 10 – 90 ملليجرام
من 1000-9000 ملليجرام

9

فكّر بنفسك ، ممكن تاكل أكل نباتى و م يكنش أكل صحى .
دى الخطوط العريضة للحكاية . فيه 3 عصور لفهمنا لأهمية فيتامين سى
فاثبت مكانك ، خليك طبيعى ، كل خضار و فاكهة كتير ، كل الطرق تؤدى إلى ال plant-base diet

انضم معنا

facebook group

بحث

الأساسيات (مهم جدا)

plant based diet
Plant Based Diet Egypt
اعراض الانسحاب
العسل

معرض الصور