فقدان الوزن, قصص نجاح

بقلم: يحيى نبيل

لكل اللى داخل فى الموضوع جديد …

انا من سنة و شوية كده تقريبا كنت لسه راجع من الhoney moon بتاعى بقالى شهر و ابتديت اروح الشغل و مرة واحدةابتدا يجييلى دوخة جامدة و يوم عن يوم الدوخة بدأت تزيد جامد المهم الموضوع وصل لانى مش عارف انزل من السرير اقف على رجلى و شبه حيغما عليا كل شوية ..

المهم اهلى و مراتى خدونى و جرو بيا على المستشفى و بدأت السحلة الكبيرة ، مبين رسم قلب و رسم مخ و اشاعات و تحاليل و رنين مغناطيسى و اشاعات على شرايين الرقبة و رحت لاكبر دكاترة فى مصر بتاعت قلب و مخ و اعصاب و باطنة و انف و اذن .. مسبتش دكتور الا لما رحتلو حتا فيه واحد سافرتلو اسكندرية مخصوص المهم فى الاخر ولا حد عرف يشخص حالتى و الدوخة يوم عن يوم عمالة تزيد بشكل مرعب لحد مبقيت مش بعرف ادخل الحمام و دكاترة المخ و الاعصاب كل اللى بيقدرو بقولوه ان دى حالة نفسية ( مع انى لسه راجع من ال honeymoon و ابتدو يدونى ٤ انواع anti depression ( مضاد اكتئاب ) منهم اتنين ادوية محظورة ( درج) كان بيبعتنى اجيبهم من عند واحد اكنى بسكور مخدرات و لما دخلت قريت عن الادوية لقيتها خطر اوى بس مكنش قدامى بديل لان كذا دكتور كان مصمم عليهم بالذات ان حالتى بتتدهور

المهم انتهى الموضوع فى انى مرمى فى السرير ٣ شهور مش بروح الشغل و لا بقوم من السرير و حاسس ان الادوية اللى بخودها دى بتتعبنى اكتر و هنا ابتديت ادخل على النت بالعافية و ادور على اى حد فى العالم عندو نفس اعراضى و هنا برضو اتسحلت سحلة تانية مبين الطب النبوى و الحجامة و العلاج بالاعشاب واى حاجة بلاقيها قدامى بصراحة انا لو كنت قريت ان فيه احتمال ربع فى الميه انى اخف لو شربت بول كلب بلدى كنت حشربو لانى خلاص كنت يأست من الحياة

المهم انا كنت فى النص قريت عن الplant based diet و فوايده للصحة عمتا بس مفكرتش اعملو بعديها علطول قررت انى حطلع عمرة لاول مره فى حياتى عشان ادعى ربنا بعد ميأست من كل الحلول الطبية و حلول الشعوذة و فعلا رحت و دعيت و تعبت جدا طبعا و كنت كل شوية هناك اروح المستشفى المهم لما رجعت ابتديت اكمل قراية و جه فى سكتى ال plant based diet تانى ..

المرادى قلت حجرب و جربت فعلا و ابتديت من حوالى اربع شهور قبل مقولكو حصلى ايه احب اقولوكو ان لما ابتديت النظام ده كان فقط للدوخة وكان وزنى ١٠٨ كيلو على طول ١٧٠ سم بالرغم من انى كنت رياضى جدا ونا صغير و كان عندى حجات تانية ليها علاقة بالوزن مش بالدوخة زى كوليسترول و يوريك اسيد مرعب و دهون ثلاثية و اصلا عندى ضغط عالى و دهون على الكبد و نقرص ( كل الحجات دى اكتشفتها ونا بدور على سبب الدوخة بس عشان هما ملهمش دعوة بالدوخة فا مكنوش فرقنلى ) المهم اللى اقدر اقولو انى دلوقتى بروح شغلى طبيعى و الدوخة اختفت تماما و بطلت كل الادوية و بقيت بنزل اجرى و اروح الچيم و نزلت ١٨ كيلو و بقيت ٩٠ كيلو و يوم عن يوم بقا موضوع ال plant based ده ادمان و خصوصا لما خسيت و ابتديت احب شكلى بعد مكنت نسيت الموضوع ده و اخبرا بقيت بنزل اشترى لبس و بقيت ابص على اللبس اللى عاجبنى مش اللى يدارى عيوب جسمى فا ده خلا الموضوع ادمان اكتر

و كمان لما عرفت ان Mostafa Helmy حلمى بقا كده ده ادانى حماس جامد و الموضوع كبر اوى و ابتديت اقرا عن الموضوع بتعمق و اشترى كتب و وصل الادمان و من كتر الاحساس الحلو اللى انا حاسو انى نفسى اخلى كل اللى حوالية كده و فعلا مراتى بقت كده و الموضوع تتطور كمان و بقيت عايز اخلى بنتى اللى عندها ٨ شهور تبقا كده و خدتها و كل منروح لدكتور الاقيه خايف و يرفض الفكرة بدون اى مبرر تمسكا بمبدأ ( اللى نعرفو احسن من اللى منعرفهوش ) و طبعا انا مقدرش فى بنتى اعتمد على الانترنت لان دول ليهم اغذية مخصوص و الموضوع داخل فيه قصص الحساسية و موضوع كبير فا الموضوع كبر فى دماغى و قدمت فى جامعة فى امريكا عشان ادرس تغذية و اخد شهادة و سعتها اعرف انا اعمل نظام لبنتى و كمان اقدر اساعد اى حد محتاج مساعدة زى ما كنت انا محتاج

ملحوظة : انا كنت مدمن اكل و كل كيلو من ال ١٠٨ دول كان جاى بمزاج اوى لانى جسمى مش بيتخن بسهولة فا كنت بعشق الطرب و الريش و الملح و السمنة و اى حاجة دسمة عموما فا انا لما اقول ان الاكل الplant based حلو و ان حتحبو بس مسألة وقت فا اظن ان شهادتى يعتمد بيها تانى حاجة انا بقول كل يوم الحمدلله على اللى وصلتلو و صحتى و النشاط الغير طبيعى اللى بقا عندى اللى مكنش عندى حتا ايام مكنت رياضى و رفيع و الحمدلله على معنوياتى اللى بقت مرتفعة جدا وكل ده بفضل ربنا ثم ال plant based diet

اخر حاجة : من اسبوع عملت تحاليل الدكتور بعد م بهدلنى من كذا شهر و قالى دى تحاليل واحد عندو ستين سنة دلوقتى مكنش مصدق عينو و قالى دى تحاليل واحد رياضى .. كل حاجة وصلت للمعدلات الممتازة اليوريك اسيد بقا ٥ و الكوليسترول بعد مكان ٣٠٠ بقا ١٧٠ و الدهون الثلاثية اختفت فا بجد اللى اقدر اقولو ان الموضوع سحر و يستاهل تتعب شوية و شكرا

انضم معنا

facebook group

بحث

الأساسيات (مهم جدا)

Plant Based Diet Egypt
The Protein Myth

معرض الصور