السكر, فقدان الوزن, قصص نجاح, مصطفى حلمي

بقلم: مصطفى حلمي

كان عندي عاده الله لا يعيدها تاني أبداً، وهي إني أطلب السوبر ماركيت، وأجيب منه تشكيله من أجود الشوكلاطات…الطلب المكرر بتاعي كان إتنين كيت كات كبير، إتنين فلوتس كبير، واحده سنيكرز، واحده جلاكسي بالزبيب، واحده كتاكيتو، وساعات شويه مولتو على شوكلاطه بابلي..كده يعني.
اللي يقرا الليسته دي يفتكر إني كنت باكل الحاجات دي على مدار كذا يوم، لكن الحقيقه – وأنتوا مش غرب يعني – أنا كنت باكل الحاجات دي في ساعه أو إتنين!
اللي كان بيحصل إني بقول أنا هاكل واحده وأسيب الباقي لبعدين، لكن زي إعلانات الشيبسي كده، باكل واحده، وماقدرش أوقف، فآكل اللي بعدها واللي بعدها، لغاية ما ألاقي الكيس بقى عباره عن ورق الشوكلاطه الفاضي بس.
بعد كده فهمت، إن السكر بيضرب مركز المتعه في المخ، فلما تاكل حاجه فيها سكر، جسمك بيفرز endorphins تخليك مبسوط، فتفضل زي المدمن، تاكل سكر وتستمتع بالمتعه اللحظيه بتاعته أو الHigh بتاعته اللي بتقعد دقايق، بعدين ترجع تهرش لغاية ما تاخد الجرعه اللي بعدها.

الموضوع حقيقي، مش شغل إعلانات بس..متعه physical، ودماغ عاليه، بيتبعها زي أي مخدر low أو فصلان، يخليك قرفان أو مكتئب ويحولك لemotional eater أو واحد بيلجأ للأكل عشان يحسن حالته النفسيه.
بعد أربع شهور ونص من الPlant Based Diet ماحطتش في بقى ولا تنتوفه حاجه مسكره، أختي كانت راجعه من السفر، وجايبه حاجه كده هي نوع من الجنزبيل اللي معمول في صورة حلوى…أنا كنت فاكره الأول ماعليهوش إضافات، فأكلت حته صغيره جداً ماتجيش عقلة صباع حتى…فجأه حسيت بنفس الإحساس اللي كنت بحسه لما وأنا صغير كنت باخد بواكي الsweetener الدايت أو السكارين وأدلقها في بقي…والسبب إن السكارين ده مسكر أكتر من السكر نفسه، وبيسيب طعم مصنع بشع في البق بعد ما تاكله.
إستغربت جداً من الشيء البشع اللي أنا أكلته ده وكم السكارين اللي فيه..بعدين لاقيت أختي بتدوقه وبتقول “لأ عادي مش مسكر قوي!!”.
لسانك زي ما بتعوده..الفاكهه دلوقتي بقت بالنسبه لي مسكره..عمري ما كنت بحب الفراوله، ودلوقتي بقيت بحسها مسكره..البطاطا بقيت باكلها كأني باكل كريم كراميل، وأفضل متشكك في إذا كانوا ضايفين لها سكر أو عسل!!
سبحان مغير الأحوال!
إصبروا بس أول كام إسبوع، وكل المتع اللي أنت فاكر إنك حارم نفسك منها، هتلاقيها موجوده، بس في حاجه تانيه..حاجه مابتخنكش ولا بتعييك ولا بتخليك تحت رحمة دوا أو دكتور أو محل لبس هو الوحيد في مصر اللي عنده مقاسك.

انضم معنا

facebook group

بحث

الأساسيات (مهم جدا)

اعراض الانسحاب
العسل

معرض الصور