سبانخ, سموذي, مشروبات, موز, وصفات

كلنا عارفين الsmoothie … فاكهه أو خضار مضروبين و معاهم سائل و مواد تدي طعم.
السموذي بإيدنا نحوله لشيء قمة في التغذية و جسمنا يستفيد من كل نقطة فيه و بسهولة ممكن يتحول لشوية سكريات و دهون و كالوريز خدناهم على الفاضي.

ناس كتير بتعتمد على السموذي إعتماد كلي في النظام الصحي بتاعها (فطار و غدا و عشا) و بيجيب معاهم نتائج رائعة .

الموضوع بسيط جداً … كوباية واحده تقدر تحط فيها كل العناصر الغذائية اللي إنت محتاجها بتشربها من غير متعمل أي مجهود و معدتك هتهضمها بسهوله عشان الالياف كلها مفرومه جواها.

للمبتدئين في العالم ده، هقولكم علي وصفة سموزي طعمه حلو، مليان فوايد و بيشبــــع بطريقة غير طبيعية.

السموذي الأخضر Green Smoothie:

المكونات (تكفي فرد واحد كوجبة):

موزة كبيرة مفرزه (حطيتها ساعه في الفريزر)
معلقة زبدة فول سوداني بدون سكر
تمرة (من الكبير الطري ده)
كوب لبن بارد (ممكن برضه استخدام مياه او لبن صويا او لبن جوز هند او لبن لوز)
1/2 ل 1 كوب سبانخ طازة (أنا حطيت كبشة كبيرة بإيدي)

الطريقة:

هنحط السبانخ و فوقها التمرة و فوقها الpeanut butter و فوقها الموزه و نحط اللبن و نضرب كله مع بعض لحد مالخليط يبقى ناعم خالص و بعدين نصبه و نقدمه.

ملاحظات

– دايماً أما نعمل سموذي نحاول نستخدم خلاط قوي، و نحط الحاجات الخفيفه تحت و التقيله فوق عشان تضغط عليها (عشان كده بدأنا هنا بالسبانخ أول حاجة تحت).
– السموذي ده بينفع وجبة لوحده (فيه كل العناصر الغذائية اللي الجسم محتاجها)، إحنا شربناه و فضلنا 4 ساعات بعده شبعانين ( ده مش الطبيعي بتاعنا خالص)، فممكن تدوه للولاد في الفطار او و هما رايحين المدرسة، و بينفع أوي ناخده معانا كوجبة في الشغل.
– السموذي طعمه جميل و السبانخ مش باينه فيه خالص كأنك بتشرب عصير موز (بنتي ما شاء الله خلصت كوبايتها كلها).
– الGreen Smoothie ليه طرق كتير و الناس بتبدع فيه زي ما هي عايزه ، ممكن تحطوا فيه مانجا ، فراوله ، توت ، كيوي ، تفاح ، خس ، خيار ، جزر ، بروكلي ، كرات … بس لو اول مره تجربوا ده هيشجعكم ان شاء الله.
– الناس اللي بتعتمد على الsmoothie و الjuicing في الدايت بتاعهم بيعصروا أغلب الوقت خضار ، و كمية الفاكهة بتكون قليله جدا” … فمينفعش أفضل إسبوع كامل أعصر فواكه و اشربها و أقول أنا بعمل نظام صحي، كده خدنا سكر أكتر من إحتياجنا و الجسم مش هياخد كل الفوايد اللي محتاجها.
بس كده … جربوا و قولولي النتيجة … بالهنا و الشفا

انضم معنا

facebook group

بحث

الأساسيات (مهم جدا)

العسل

معرض الصور