B12, الأطفال, السرطان, السكر, باسم يوسف, سؤال وجواب

بقلم: باسم يوسف

ححاول النهاردة اجاوب على شوية اسئلة:

مرضى السرطان و الغدة الدرقية و خلافه:

احنا مش حل سحري لكل الامراض و الا نبقى عبد العاطي و كفتة ستايل. انا مؤمن ان الاسلوب الغذائي ده بيحمي من امراض كتيرة بل و بيعالجها لكن التصريح بيه و العلاج بيه ده مسئولية ماحدش يقدر يتحملها و خاصة على جروب فيس بوك. و مع ذلك فيه نقطة مهمة جدا. كل امراض الدنيا سببها في الاخر حاجة واحدة: من البرد للامراض المناعية للسرطان: كلها بتبتدي ان بيئة الخلايا بتتغير من القلوية للحمضية. احنا مخلوقات قلوية (alkaline ) فعشان كده الاكل القلوي (النباتات) مناسبة لجسمنا. الاسود و النمور و القطط و الكلاب كائنات حمضية acidicعشان كده اكلها للحمة شئ طبيعي. لما بتغيروا البيئة بتاعة الخلايا بيحصل inflammation على مستوى الخلايا. على حسب حجمه و طول مدته و قوته بيحصل المرض ، من البرد الى حاجات اسوأ من كده. حتى امراض القلب مش بتبقى مجرد اسداد في الشرايين و بس، لا بيبقى فيه ضرر في خلايا الاوعية من كتر ترسب الدهون بيبقى فيه التهاب و مضاعفاته. المهم في الاخر الاكل الصحي ده هدفه انه يخلي جسمك كويس و صحي و ما يبقاش عليه حمل و عبئ التعامل مع الاكل الحيواني و السكر و الالبان اللي فعلا مضرة جدا للجسم.
– فيه مراكز عالمية زي True North في كاليفورينا بتعالج الامراض عن طريق الاكل. بس ده بوست منفصل.

فيتامين ال B12 للاطفال :

فيه حاجات بتتباع كشرب تحت اللسان فمش لازم حقن. اللي خايف من نقص الفيتامين ممكن ياكل لحمة مرة في الاسبوع (لو ماعندوش امراض تانية) مع ان بصراحة لو فيه نقص B12 في النباتات فغالبا فيه نفص في اللحوم. حتى اللي بياكلوا لحمة عندهم النقص ده. فيه صورة كنت شيرتها قبل كده لموضوع ال B 12 ده

الخضار و المبيدات و الكلام ده:

طبعا عندنا مشكلة ايه هو الاورجانيك و اذا كان فعلا اوجانيك. بصوا ياجماعة، انا حبقى ادورلكم كده على كتاب عندي اسمه The Starch Solution رائع جدا و بيناقش الموضوع ده من ضمن موضوعات كتيرة. فيه بالميكروجرام نسبة موضوع المبيدات ده و ازاي ان مجرد غسيل الخصار كويس بيغسل ده كله و ان ده كان جزء من حملة ممنهجة في امريكا عشان يبعدوا الناس عن الخضار ده . حدور عليه و اقولكم. فكلوا عادي بس اغسلوه كويس قوي.

مرضى السكر:

يخلوا بالهم من الفاكهة يا جدعان. يقللوا شوية. خضار كتير جدا و نشويات بحساب.

بلاش حسوكة:

مش مشكلة لو كلت كتير . جسمك حيتعود بعد كده. انت دلوقتي عندك فزع انك تجوع، بعد شوية جسمك حياخد اللي هو عايزه. تاني حاجة انا باشوف ناس بتقول لحد ناشر صور اكله ده مضر و بلاش من ده. نظريا صح لكن لو انت عارف ان ده غلط ممكن تقلل منه. بالتدريج حتعرف تاكل ايه.
بالتوفيق يا جماعة. و ياريت اللي داخل جديد ياخدله غطس في الجروب و يقرا اللي فاته. و كمان فيه حد هنا لسه كاتب بوست ازاي تدور على كلمه او موضوع عشان الاسئلة اللي انت عايز تسألها. صباح/مساء الخير على حسب انتم فين

انضم معنا

facebook group

بحث

الأساسيات (مهم جدا)

The Protein Myth
اعراض الانسحاب
Plant Based Diet Egypt
Plant Based Diet Egypt

معرض الصور